Hər dövrün öz qəhrəmanları, öz unudulmaz simaları olur. Lakin bəzi insanlar var ki, onların göstərdiyi fədakarlıq hər hansı bir xidməti vəzifə borcunu, rəsmi öhdəliyi aşaraq təmiz, təmənnasız Vətən sevgisinin və ali insaniyyətin ən uca təcəssümünə çevrilir. Fakültəmizin “İqtisadiyyatın hüquqi tənzimlənməsi” ixtisasının məzunu belə müstəsna ömür yaşayan, Vətənin ən dar günündə ürəyinin hökmü ilə irəli atılan işıqlı, unudulmaz simalardan biridir – Fərman Elçin oğlu Əsədli.

Onu tanıyanların, birlikdə təhsil aldığı tələbə yoldaşlarının və müəllimlərinin hafizəsində o, ilk növbədə göyçək çöhrəsi, daim gülərüz siması və gözlərinin dərinliyindən saçılan səmimi, isti işığı ilə həkk olunub. Bütün varlığı ilə ətrafına nur, ümid və nikbinlik paylayan bu gənc, həyat yolunu hüquq və ədalətin, iqtisadi intizamın təmin olunmasına həsr etmək niyyətində idi. Lakin 2016-cı ilin 2 aprel səhəri başlanan Aprel döyüşləri onun taleyində tamamilə fərqli, əbədi və şərəfli bir səhifə açdı.

O, həmin günlərdə hərbi qulluqçu deyildi; üzərində hərbi forma, əlində silah yox idi. Lakin cəbhə bölgəsindən gələn xəbərləri eşidən kimi şəxsi təhlükəsizliyini, gənclik arzularını və rahatlığını bir anlıq da olsun düşünmədən, tərəddüdsüz könüllü kimi irəli atıldı. Yaxın qohumu Sadiq Natiq oğlu Əliyevlə çiyin-çiynə verərək döyüşlərin ən şiddətli və təhlükəli getdiyi Tərtər rayonuna yollandı.

Tərtərdə düşmən mərmilərinin yağdığı anlarda o, ön xətdə əsl mənəvi qəhrəmanlıq nümayiş etdirdi. Mülki əhalinin təhlükəsiz zonaya çıxarılmasına kömək etdi, yaralanan soydaşlarımıza və Azərbaycan hərbçilərinə ilkin yardım göstərdi, səngərdə vuruşan əsgərlərimizin yanında duraraq onlara mənəvi-psixoloji dəstək oldu. Onun gözlərindəki həmin o tanış işıq və çöhrəsindəki məğrur gülərüzlük, Tərtərdə mərmilər altında ümidə və təsəlliyə ehtiyacı olan hər kəsə mənəvi güc bəxş edirdi. O, silahla deyil, böyük qəlbi və sarsılmaz ruhu ilə vuruşurdu.

Elə bu ali fədakarlığı göstərərkən – insanlara, yaralı əsgərlərə, mülki vətəndaşlara əl uzadarkən 2016-cı il aprelin 2-də şəhadət zirvəsinə ucaldı.

Dövlətimiz onun bu misilsiz şücaətini və vətənpərvərliyini yüksək qiymətləndirərək ölümündən sonra “Şücaətə görə” medalı ilə təltif etdi, həmçinin o, “Vətən naminə” medalı ilə mükafatlandırıldı. Yazıçı Gülnarə Sadıq onun qısa, lakin mənalı həyatına və cəbhə bölgəsində göstərdiyi misilsiz cəsarətə həsr olunmuş “26 gün” romanını qələmə alaraq onun qəhrəmanlığını əbədiləşdirdi.

Böyük qəhrəmanımızın əziz xatirəsini yaşatmaq, onun işıqlı əksini gələcək nəsillərə ötürmək məqsədilə fakültəmizdə onun adına xüsusi auditoriya istifadəyə verildi. Auditoriyanın girişində, divarda onun ömür yolunu əks etdirən möhtəşəm xatirə guşəsi hazırlandı.

Həmin guşədən baxan Fərmanın şəkilləri hər bir gələn-gedəni bir anlıq ayaq saxlamatğa vadar edir: divardan boylanan o gülərüz, nurlu rəsm, həmin gülüşün arxasında gizlənən məğrur qəhrəman baxışı və parlayan “Şücaətə görə” mükafatlarının rəsmləri… O gözlərdəki işıq sanki hər dəfə auditoriyaya daxil olan tələbələrə vətənpərvərlikdən, fədakarlıqdan dərs keçir.

Auditoriyanın açılış mərasimi isə hər birimizin yaddaşına silinməz, son dərəcə kövrək anlarla həkk olundu. Tədbirə qəhrəmanımızın atası da təşrif buyurmuşdu. Oğlunun adını daşıyan auditoriyanın qapısı açılarkən, divardakı o tanış, nurlu gülüşə baxan atanın gözlərindəki qürurla qarışmış kədər mərasimdə olan hər kəsin qəlbini titrətdi. Bütün zalın gözləri doldu, boğazlarda duyğular düyünləndi. Bu, sadəcə bir auditoriya açılışı deyil; bir atanın oğluna, bir universitetin öz qəhrəman məzununa göstərdiyi ən ali ehtiram və sevgisinin təzahürü idi.

Bu gün fakültəmizin hər bir tələbəsi onun adını daşıyan auditoriyaya daxil olarkən yalnız bir dərs otağına deyil, silahsız ikən səngərə tələsən, vuruşmadan qəhrəman olan, insaniyyətin və Vətən sevgisinin ən ali zirvəsini fəth edən bir şəxsiyyətin ocağına qədəm qoyur. O, gözlərindəki sönməz işıqla hafizələrimizdə gülərüz bir dost, şücaəti ilə isə Azərbaycanın zəfər və qürur tarixində əbədi yaşayacaq bir qəhrəmandır.

Allah rəhmət eləsin!